लोकनेते विलासकाका पाटील यांची ८७ वी जयंती १५ जुलै रोजी; कराड येथे अभिवादन आणि आरोग्य शिबिराचे आयोजन
कराड प्रतिनिधी, दि. १२ | चांगभलं वृत्तसेवा
महाराष्ट्र राज्याचे माजी सहकार मंत्री, लोकनेते स्व. विलासकाका पाटील (उंडाळकर) यांची ८७ वी जयंती मंगळवारी, दिनांक १५ जुलै २०२५ रोजी कराड येथे साजरी होणार आहे. यानिमित्त अभिवादन कार्यक्रमाचे आयोजन करण्यात आले असून, विविध क्षेत्रातील मान्यवरांची उपस्थिती राहणार आहे.
कोयना सहकारी बँकेच्या मुख्य कार्यालयाजवळील लोकनेते विलासकाका पाटील प्रवेशद्वार, मार्केट यार्ड, कराड येथे सकाळी १०.३० ते दुपारी ४.३० या वेळेत अभिवादन कार्यक्रम होणार आहे. या कार्यक्रमासाठी रयत संघटनेच्यावतीने सर्व नागरिक, सहकार क्षेत्रातील कार्यकर्ते, संस्था प्रतिनिधी आणि सामाजिक-राजकीय क्षेत्रातील मान्यवरांना उपस्थित राहण्याचे आवाहन करण्यात आले आहे.
स्व. विलासकाका पाटील यांचा जन्म १५ जुलै १९३८ रोजी झाला. त्यांनी जिल्हा परिषद सदस्य म्हणून सुरू केलेली राजकीय वाटचाल सलग ३५ वर्षे आमदार आणि नंतर विविध खात्यांचे मंत्री म्हणून प्रभावीपणे पार पाडली. विशेषतः ‘सहकार’ आणि ‘ग्रामीण विकास’ या क्षेत्रात त्यांचे योगदान आजही प्रेरणादायी ठरते.
दरम्यान, त्यांच्या जयंतीनिमित्त मंगळवार, दिनांक १७ जुलै २०२५ रोजी शेती उत्पन्न बाजार समितीच्या सभागृहात मोफत निसर्गोपचार आणि आरोग्य तपासणी शिबिराचे आयोजन करण्यात आले आहे. या उपक्रमाची माहिती बाजार समितीच्यावतीने देण्यात आली.
