हिंदकेसरीकडून महाराष्ट्र केसरीचा सत्कार

चांगभलं ऑनलाइन | कराड प्रतिनिधी
पुणे ते झालेल्या स्पर्धेतून महाराष्ट्र केसरीची गदा पटकावलेला कोल्हापूरच्या गंगावेश तालमीचा मल्ल सिकंदर शेख यांनी शनिवार, दि. २५ नोव्हेंबर रोजी हिंदकेसरी संतोषआबा वेताळ यांच्या सुर्ली येथील निवासस्थानी त्यांची सदिच्छा भेट घेतली. यावेळी पैलवान संतोषआबा वेताळ यांनी केलेल्या छोटेखानी सत्काराने पै. सिकंदर भारावून गेला.

पुणे ते नुकत्याच झालेल्या महाराष्ट्र केसरी कुस्ती स्पर्धेतून कोल्हापूरच्या गंगावेश तालमीचा मल्ल सिकंदर शेख याने महाराष्ट्र केसरीची गदा पटकावली होती. शनिवारी सांगली जिल्ह्यातील विटा परिसरातील धामणी गावात कुस्ती मैदानाला भेट देण्यासाठी सिकंदर शेख कराड मार्गे विट्याकडे निघाला होता. यावेळी त्याने आवर्जून सुर्ली येथे हिंदकेसरी संतोषआबा वेताळ यांची त्यांच्या निवासस्थानी सदिच्छा भेट घेतली. या भेटीत त्याने संतोषआबा यांचा आशीर्वाद घेतला. सिकंदर शेख याने महाराष्ट्र केसरीची गदा पटकावल्याबद्दल संतोषआबा वेताळ यांनी या भेटीवेळी सिकंदरचा शाल, श्रीफळ व बुके देऊन छोटेखानी सत्कार केला. संतोषआबा यांच्या या सत्काराने सिकंदर भारावून गेला.

दरम्यान, महाराष्ट्र केसरी सिकंदर शेख याचा लवकरच सुर्ली ग्रामस्थांच्यावतीने भव्य सत्कार सोहळा घेणार असल्याचे संतोषआबा वेताळ यांनी यावेळी आवर्जून सांगितले. याप्रसंगी पैलवान कमलजीत (पंजाब), पैलवान संभाजी मोहिते, पैलवान केशव पवार, सुर्ली गावचे उपसरपंच राहुल वेताळ, पैलवान वैभव डोंब व ग्रामस्थ उपस्थित होते.