कराड दक्षिणमधून शिवसेना उबाठा गट स्वबळावर लढण्याच्या तयारीत

चांगभलं ऑनलाइन | कराड प्रतिनिधी
शिवसेना कराड दक्षिण कार्यकारणी पदाधिकाऱ्यांची बैठक शिवसेना संपर्क कार्यालय शास्त्रीनगर मलकापूर येथे उपजिल्हाप्रमुख नितीन काशीद व जिल्हा संघटिका अनिताताई जाधव यांच्या उपस्थितीत पार पडली. या बैठकीस तालुका प्रमुख शशिकांत हापसे, दिलीप यादव, शहर प्रमुख शशीराज करपे मधुकर शेलार, कविताताई यादव आदींची उपस्थिती होती. या बैठकीत कराड दक्षिण विधानसभा निवडणूक स्वबळावर लढण्याची तयारी ठेवून मतदार संघातील इच्छुक उमेदवारांची नावे शिवसेना भवन येथे ठराव करून पाठवण्यात आली.

यावेळी बोलताना उपजिल्हाप्रमुख नितीन काशीद म्हणाले की, पक्षप्रमुख उद्धव ठाकरे यांच्या नेतृत्वाखाली लोकसभेत पक्षाने अत्यंत चांगली कामगिरी बजावली असून लोकशाही व संविधानाच्या संवर्धनासाठी महाराष्ट्राचा चौफेर विकास करण्यासाठी उद्धव बाळासाहेब ठाकरे यांच्या नेतृत्वाखाली आगामी निवडणुकांना सामोरे जाण्यासाठी शिवसेना कराड दक्षिण मधील पदाधिकारी सज्ज आहेत व पक्ष नेतृत्व जो आदेश देईल, त्यानुसार कराड दक्षिण विधानसभा मतदार संघातील उमेदवार विजयी करण्यासाठी प्रयत्नाची पराकाष्टा करेल.

दरम्यान, विधानसभा मतदारसंघाच्या पदाधिकाऱ्यांचा व शिवसैनिकांचा मेळावा तातडीने घेण्याचे या बैठकीत ठरले. उपतालुकाप्रमुख संजय चव्हाण, अनिल चाळके, अजित पुरोहित सौरभ कुलकर्णी, महेश भावके, प्रवीण लोहार, विभाग प्रमुख सतीश भुजंगराव धुमाळ, दिनकर मारुती चोरगे, ओंकार काशीद , विद्यानंद पाटील व प्रमुख पदाधिकारी उपस्थित होते.