१ फूट लांबीची मिरची, दीड फुटाची लोंबी, इलेक्ट्रिक बैल अन् बरंच काही!

चांगभलं ऑनलाइन | हैबत आडके

: कराड येथील छत्रपती शिवाजी महाराज स्टेडियमवर आजपासून (ता. १७) आंतरराष्ट्रीय कृष्णा कृषी महोत्सवाला प्रारंभ होत आहे. कराडमध्ये प्रथमच आंतरराष्ट्रीय स्वरुपाचा कृषी महोत्सव होत असून, विविध प्रकारचे कृषी तंत्रज्ञान एकाच छताखाली पाहायला मिळणार आहे. एकूणच कराडमध्ये आजपासून कृषी पंढरीच जणू अवतरणार आहे.

कृष्णाकाठाचे भाग्यविधाते सहकारमहर्षी स्व. जयवंतराव भोसले (आप्पासाहेब) यांच्या जयंतीनिमित्त य. मो. कृष्णा सहकारी साखर कारखाना पुरस्कृत कृष्णा कृषी परिषदेच्या माध्यमातून आणि कृष्णा विश्व विद्यापीठ व कृष्णा सहकारी बँकेच्या सहकार्यातून कराड येथील छत्रपती शिवाजी महाराज स्टेडियमवर १७ ते २१ जानेवारी दरम्यान आंतरराष्ट्रीय कृष्णा कृषी व औद्योगिक महोत्सवाचे आयोजन करण्यात आले आहे. य. मो. कृष्णा सहकारी साखर कारखान्याचे चेअरमन डॉ. सुरेश भोसले यांच्या मार्गदर्शनाखाली व भाजपाचे सातारा लोकसभा प्रभारी डॉ. अतुलबाबा भोसले यांच्या संकल्पनेतून होत असलेल्या या महोत्सवाची तयारी जवळपास पूर्ण झाली आहे.

या कृषी महोत्सवाचे उद्घाटन बुधवारी (ता. १७) सकाळी ११ वाजता महाराष्ट्राचे उपमुख्यमंत्री ना. देवेंद्र फडणवीस यांच्या हस्ते होणार आहे. याप्रसंगी राज्यसभेचे खासदार श्री. उदयनराजे भोसले, आ. शिवेंद्रसिंहराजे भोसले, आ. जयकुमार गोरे, ज्येष्ठ नेते मदनराव मोहिते आदी मान्यवर उपस्थित राहणार आहेत.

छत्रपती शिवाजी महाराजांच्या राज्याभिषेक सोहळ्याचे ३५० वे वर्ष सर्वत्र साजरे होत असल्याच्या पार्श्वभूमीवर या महोत्सवाचे प्रवेशद्वार शिवराज्याभिषेक सोहळ्याच्या संकल्पनेवर उभारण्यात आले आहे. त्याचसोबत अयोध्या येथे प्रभू श्री रामाच्या मूर्ती प्राणप्रतिष्ठापणेच्या सोहळ्यानिमित्ताने प्रभू श्री रामाची भव्य प्रतिमा प्रवेशद्वाराजवळ उभारण्यात आली आहे. कराडमध्ये पहिल्यांदाच आंतरराष्ट्रीय कृषी प्रदर्शन होत असून, यासाठी ११ देशातील तज्ज्ञ उपस्थित राहणार आहे.

तसेच याठिकाणी शासकीय दालन, यंत्रे व औजारे दालन, गृहपयोगी वस्तूंचे दालन, महिला बचत गटांचे स्वतंत्र स्टॉल, तृणधान्य महोत्सव, आंतरराष्ट्रीय संमेलन व खाद्यजत्रा असणार आहे. याचबरोबर महोत्सवात जातिवंत जनावरांसह अनेक वैशिष्टपूर्ण गोष्टींचे व शेतीविषयक उपकरणांचे आकर्षण राहणार आहे. या महोत्सवात देशातील सर्वांत उंच आणि देखणा असा सोन्या बैल, देशातील सर्वांत उंच बैलासोबतच भारतातील सर्वांत लहान पुंगनूर जातीची अडीच फूट उंचीची गाय, २ टन वजनाचा रेडा, १ फूट लांबीची मिरची, दीड फुटाची लोंबी, इलेक्ट्रिक बैल हीदेखील खास आकर्षणे ठरणार आहेत. याठिकाणी ३६ देशातील पिकांचे नमुनेदेखील पाहण्यास मिळणार असल्याने, कृष्णा कृषी व औद्योगिक महोत्सव शेतकरी व सर्वसामान्य नागरिकांसाठी पर्वणी ठरणार आहे.

विविध स्पर्धा व चर्चासत्रांचे आयोजन

या महोत्सवात बुधवारी (ता. १७) दुपारी ३ वाजता सतीश खाडे यांचे ‘पाणी व्यवस्थापन’ या विषयावर, ४ वाजता अरविंद पाटील यांचे दुग्ध व्यवसाय : भविष्यातील एक नवी दिशा, गुरुवारी (ता. १८) सकाळी १० ते दुपारी २ दरम्यान ऊस पीक, केळी व घड प्रदर्शन व स्पर्धा, दुपारी ३ वाजता डॉ. रामचंद्र साबळे यांचे हवामान बदल व शेती व्यवस्थापन, ४ वाजता डॉ. दशरथ तांबाळे यांचे सेंद्रीय शेती या विषयावर, शुक्रवारी (ता. १९) सकाळी १० ते दुपारी २ दरम्यान फुले प्रदर्शन व स्पर्धा तसेच म्हैस, गाय, जातिवंत खोंड, कालवड प्रदर्शन व स्पर्धा, दुपारी ३ वाजता डॉ. एस. डी. गोरंटीवार यांचे भविष्यातील शेती व डिजीटल तंत्रज्ञानाची आवश्यकता, दुपारी ४ वाजता श्री. शैलेश जयवंत यांचे पॅकेजिंग इंडस्ट्री या विषयावर, शनिवारी (ता. २०) सकाळी १० ते दुपारी २ दरम्यान फळे प्रदर्शन व स्पर्धा तसेच श्वान प्रदर्शन व स्पर्धा, दुपारी १ वाजता डॉ. शांताराम गायकवाड यांचे दुग्ध व्यवसायातील नवीन संधी, दुपारी २ वाजता सौ. उमा मांगले यांचे तृणधान्य प्रक्रिया उद्योग या विषयावर, रविवारी (ता. २१) सकाळी १० ते दुपारी २ दरम्यान भाजीपाला पीक प्रदर्शन व स्पर्धा, दुपारी ३ वाजता सुरेश कबाडे यांचे ऊस शेती तंत्रज्ञान, दुपारी ४ वाजता पाशा पटेल (अध्यक्ष, कृषी मूल्य आयोग) यांचे बांबू लागवड व प्रक्रिया उद्योग या विषयावर मार्गदर्शन होणार आहे.

कृष्णा कृषी महोत्सवात कराडकरांना मिळणार सांस्कृतिक पर्वणी

कृष्णा सांस्कृतिक महोत्सवात नामांकित कलाकारांची उपस्थिती

कराड येथील छत्रपती शिवाजी महाराज स्टेडियमवर आयोजित कृष्णा कृषी महोत्सवात कराडच्या रसिकांना सांस्कृतिक पर्वणी लाभणार आहे. कृषी महोत्सवांतर्गत १७ ते २० जानेवारी दरम्यान कृष्णा सांस्कृतिक महोत्सवाचे आयोजन करण्यात आले असून, यानिमित्ताने नामांकित कलाकार उपस्थित राहणार आहेत.

बुधवारी (ता. १७) सायंकाळी ५ वाजता महाराष्ट्राची लोकधारा दाखविणारा ‘जय जय महाराष्ट्र माझा!’ हा कार्यक्रम आयोजित करण्यात आला आहे. भूपाळी ते भव्य दिव्य शिवराज्याभिषेक सोहळा दाखविणारा हा कार्यक्रम आपल्या सादरीकरणातून महाराष्ट्राच्या संस्कृतीची नृत्य संगीतमय गाथा सादर करणार आहेत. या कार्यक्रमाचे निर्मिती – दिग्दर्शन ई टीव्ही आरोही व झी टीव्ही ‘सारेगम’ अंतिम विजेता फेम महेश हिरेमठ यांनी केले आहे.

गुरुवारी (ता. १८) सायंकाळी ५ वाजता ‘सूर बहार..’ ही सदाबहार हिंदी – मराठी गाण्यांची बहारदार मैफल आयोजित करण्यात आली आहे. तसेच शुक्रवारी (ता. १९) सायंकाळी ५ वाजता ‘स्वरसांगाती’ प्रस्तुत महाकवी ग. दि. माडगूळकर व महान संगीतकार – गायक सुधीर फडके यांच्या अलौकिक प्रतिभेतून साकारलेला ‘गीत रामायण’ हा कार्यक्रम आयोजित करण्यात आला आहे. शनिवारी (ता. २०) दुपारी २ वाजता सौ. तेजस्विनी शहा यांचा खास महिलांसाठी ‘होम मिनिस्टर’ हा कार्यक्रम आयोजित करण्यात आला आहे. तसेच सायंकाळी ५ वाजता भारताची देदीप्यमान वाटचाल गायन व नृत्यातून उलगडून दाखविणारा हा ‘ये जो देस हे मेरा’ सांगितिक कार्यक्रम सादर केला जाणार आहे. मिलिंद ओक दिग्दर्शित या कार्यक्रमात ‘झी मराठी सारेगमप’ फेम गायक – गायिका सहभागी होणार आहेत. या महोत्सवासाठी प्रवेश विनामूल्य असून, रसिकांनी या अनोख्या सांस्कृतिक पर्वणीचा आनंद घ्यावा, असे आवाहन संयोजकांच्यावतीने करण्यात आले आहे.