🏊 कराडमध्ये रोटरी जलतरण स्पर्धेला उत्स्फूर्त प्रतिसाद

कराड, दि. 22 जून 2025 | चांगभलं वृत्तसेवा
रोटरी क्लब ऑफ कराडतर्फे कै. सौ. सु.ल. गद्रे यांच्या स्मृतिप्रीत्यर्थ आयोजित करण्यात आलेल्या जिल्हास्तरीय जलतरण स्पर्धेला कराडकरांसह जिल्हाभरातून मोठा प्रतिसाद मिळाला. संगम हेल्थ क्लब येथे पार पडलेल्या या स्पर्धेचे आयोजन सातारा जिल्हा हौशी जलतरण संघटनेच्या मान्यतेने करण्यात आले.

या स्पर्धेचे उद्घाटन संगम ग्रुपचे बाळासाहेब कुलकर्णी आणि रोटरी क्लब ऑफ कराडचे अध्यक्ष रामचंद्र लाखोले यांच्या हस्ते पार पडले. यावेळी जलतरण संघटनेचे सुधीर चोरगे, रोटरी क्लब सचिव आनंदा थोरात, संगम हेल्थ क्लबचे प्रमुख मुरली वत्स, प्रोजेक्ट चेअरमन अजय भट्टड आणि रोटरी क्लबचे सदस्य मोठ्या संख्येने उपस्थित होते.

स्पर्धा फ्री स्टाईल, ब्रेस्ट स्ट्रोक, बॅक स्ट्रोक आणि बटर फ्लाय अशा चार प्रकारांत विविध वयोगटांमध्ये पार पडल्या. एकूण 180 मुलं व मुलींनी सहभाग नोंदवत जलतरण कुशलतेचे दर्शन घडवले. स्पर्धेच्या व्यवस्थापनासाठी रेफ्री, लाईफगार्ड, पंच, प्रमाणपत्र लेखन यांसह सर्व यंत्रणा संगम हेल्थ क्लबने चोखपणे उभारली होती.

विजेत्या स्पर्धकांना रोटरी क्लब ऑफ कराडच्या वतीने मेडल व प्रमाणपत्र देऊन गौरवण्यात आले. विशेष कामगिरी करणाऱ्या उत्कृष्ट जलतरणपटूंना ट्रॉफी देऊन सन्मानित करण्यात आले. याचबरोबर स्पर्धा यशस्वी करण्यासाठी मेहनत घेणाऱ्या रेफ्री, लाइफगार्ड व पंच यांचा देखील मान्यवरांच्या हस्ते सत्कार करण्यात आला.
या स्पर्धेच्या यशस्वी आयोजनासाठी मुरली वत्स, ओंकार ढेरे आणि त्यांच्या सहकाऱ्यांनी महत्त्वपूर्ण भूमिका बजावली. बक्षीस वितरण कार्यक्रमासाठी महावितरण कंपनीचे कार्यकारी अभियंता बाळासाहेब मोहिते, रोटरी क्लब ऑफ पाटणचे याज्ञसेन पाटणकर, संजीव चव्हाण, शेंडे, उंब्रज रोटरी क्लबचे रविराज पाटील, माजी नगरसेवक सौरभ पाटील, पी.डी. पाटील बँकेचे संचालक हेमंत ठक्कर, हर्ष भेदा आदी मान्यवर उपस्थित होते.

रोटरी क्लबचे किरण जाधव, बद्रीनाथ धस्के, जगदीश वाघ, डॉ. शेखर कोगणूळकर, सुहास पवार, जयंत जगताप, शिवराज माने, गजानन कुसुरकर, राजगौंडा अपीने, विशाल घुटुकडे, राहुल पुरोहित, हर्षला देशमुख यांनी परिश्रम घेत स्पर्धा यशस्वी केली.