पावणे पाच लाखांचे मोबाईल हँडसेट मूळ मालकांना मिळाले परत

चांगभलं ऑनलाइन | उंब्रज प्रतिनिधी
कराड तालुक्यातील उंब्रज विभागातील नागरिकांचे गहाळ झालेले तब्बल पावणे पाच लाख रुपये किंमतीचे मोबाईल हँडसेट शोधून ते मूळ मालकांना परत मिळवून देण्याची उत्कृष्ट कामगिरी उंब्रज पोलिसांनी केली आहे. उंब्रज पोलिसांच्या या कामगिरीचे परिसरातून कौतुक होत आहे.

याबाबत पोलिसांकडील माहिती अशी, पोलीस अधीक्षक समीर शेख, अप्पर पोलीस अधीक्षक वैशाली कडूकर, कराडचे पोलीस उपाधीक्षक अमोल ठाकुर यांनी उंब्रज पोलीस ठाण्याचे सहाय्यक पोलीस निरीक्षक रविंद्र भोरे यांना उंब्रज पोलीस स्टेशन हद्दीतील गहाळ मोबाईल तक्रारीबाबत गांभीर्याने लक्ष पुरवून जास्तीत जास्त मोबाईलचे शोध घेवून नागरिकांना परत करणे बाबत सुचना दिलेल्या होत्या. त्या अनुषंगाने सपोनि रविंद्र भोरे यांनी गुन्हे प्रकटीकरण पोलीस अंमलदार यांना योग्य ते मार्गदर्शन करून गहाळ मोबाईलचा शोध घेण्याच्या सूचना केल्या. त्याप्रमाणे हवालदार मयुर थोरात व इतर पोलीस अंमलदार यांनी सायबर पोलीस ठाण्याच्या माध्यमातून व सी. ई. आय. आर पोर्टल वरुन तांत्रिक माहिती प्राप्त करुन त्यांचे तांत्रिक माहितीचे विश्लेषन करुन सदरचे गहाळ झालेले मोबाईलचे तात्काळ शोध घेवून सातारा तसेच कोल्हापूर, सोलापूर, सांगली, पुणे, रायगड जिल्ह्यातून एकूण २५ मोबाईलचा शोध घेवून गहाळ झालेले मोबाईल नागरिकांना परत केले‌. या सर्व मोबाईल संचांची एकूण किंमत ४ लाख ७६ हजार रुपये इतकी होती. ते पोलिसांकडून सपोनि रवींद्र भोरे यांच्या हस्ते मुळ मालकांना परत करण्यात आले. या कामगिरीमुळे परिसरातील नागरिकांनी उंब्रज पोलिसांचे कौतुक केले आहे. दरम्यान, सपोनि रविंद्र भोरे यांनी मोबाईल शोध मोहिममध्ये अशाच प्रकारचे सातत्य राहिल, असे सांगितले आहे.

सदरची कामगिरी पोलीस अधीक्षक समीर शेख, अप्पर पोलीस अधीक्षक वैशाली कडूकर, पोलीस उपाधीक्षक अमोल ठाकुर यांच्या मार्गदर्शनाखाली सहा. पोलीस निरीक्षक रविंद्र भोरे, पोलीस उपनिरीक्षक रमेश ठाणेकर, पोलीस उपनिरीक्षक कोमल पाटील, पो. कॉ. मयुर थोरात, पो. कॉ. राजकुमार कोळी, पो. कॉ. प्रशांत पवार, तसेच सायबर पोलीस ठाणेचे पो. कॉ महेश पवार यांनी केली आहे.