चांगभलं ऑनलाइन | कराड प्रतिनिधी
मंदिरातून होणाऱ्या चोऱ्यांची सर्वत्र चर्चा सुरू असतानाच कराडनजिकच्या मलकापूर शहरातील श्री गणेश मंदिरातून दानपेटीतील रोकड व चांदीचे आवरण असलेली गणेश मूर्ती चोरी झालेला गुन्हा अवघ्या सहा तासात कराड शहर पोलिसांच्या गुन्हे प्रकटीकरण शाखेने उघडकीस आणला आहे. याप्रकरणी तीन विधीसंघर्ष बालकांना पोलिसांनी ताब्यात घेतले आहे.
पोलिसांकडून मिळालेली माहिती अशी,
दि. 10 फेब्रुवारी 2025 रोजीचे मध्यरात्री बैलबाजार रोड मलकापुर ता. कराड जि. सातारा येथील गणेश मंदीरातुन रोख रक्कम व चांदीचे आवरण असलेली धातुची गणपतीची मुर्ती चोरी झाली होती. याबाबत कराड शहर पोलीस ठाण्यात गुन्हा नोंद करण्यात आला आल्यानंतर कराड शहर पोलीस ठाणे गुन्हे प्रकटीकरण शाखेचे अधिकारी सपोनि अशोक भापकर व त्यांचे पथकाने या गुन्ह्याचा तपास शीघ्र गतीने सुरू केला. सदर गुन्हयाचे तपासादरम्यान सीसीटीव्ही फुटेज, तांत्रिक विश्लेषण व गोपनीय बातमीदार यांच्या आधारे सदर गुन्हयामधील 3 विधीसंघर्षित बालकांना गुन्हे प्रकटीकरण शाखेने ताब्यात घेवुन त्यांचेकडे कसून चौकशी केली. त्यामध्ये त्यांनी सदरचा गुन्हा केल्याची कबुली दिली. सदर गुन्हयात दानपेटीतून चोरीस गेलेली रोख रक्कम व चांदीचे आवरण असलेली धातुची गणेश मुर्ती असा एकुण 14 हजार रुपये किंमतीचा मुद्देमाल जप्त करणेत आलेला आहे. सदर विधीसंघर्ष बालकांनी अशाच प्रकारच्या चो-या केल्याचा संशय निर्माण होत असल्याने मागील काही काळात कराड, पाटण, मसुर परिसरात मंदीरातील झालेल्या चो-यांबाबतचा तपास पोलीस कसोशीने करत आहेत.
पोलीस अधीक्षक समीर शेख , अपर पोलीस अधीक्षक श्रीमती वैशाली कडुकर, कराडचे उपविभागीय पोलीस अधिकारी अमोल ठाकुर, कराड शहर पोलीस ठाण्याचे वरिष्ठ पोलीस निरीक्षक राजु ताशिलदार यांच्या मार्गदर्शनाखाली गुन्हे प्रकटीकरण शाखा अधिकारी सहा. पोलीस निरीक्षक अशोक भापकर, पोलीस उपनिरीक्षक सतिश आंदेलवार, हवालदार विजय मुळे, सज्ज़न जगताप, अनिल स्वामी, आनंदा जाधव, धिरज कोरडे, अमोल देशमुख, दिग्वीजय सांडगे, संग्राम पाटील, सोनाली पिसाळ यांच्या पथकाने ही कामगिरी केली. पथकातील सहभागी अधिकारी व कर्मचारी यांचे या कामगिरीबद्दल पोलीस अधीक्षक समीर शेख, अप्पर पोलीस अधीक्षक श्रीमती डॉ. वैशाली कडुकर, पोलीस उपाधीक्षक अमोल ठाकूर, वरिष्ठ पोलीस निरीक्षक राजू तहसीलदार यांनी अभिनंदन केले आहे.
