कराड | प्रतिनिधी
कराड- ढेबेवाडी मार्गावर कुसूर या. कराड गावच्या हद्दीत भरधाव पोलीस गाडीचा अपघात झाला. या अपघातात एकजण जागीच ठार तर अन्य तिघेजण जखमी झाले आहेत. हा अपघात रविवारी रात्री अकरा वाजण्याच्या सुमारास झाला. सुजल उत्तम कांबळे (वय- १७ वर्ष, रा. कोळेवाडी, ता. कराड) असे ठार झालेल्या युवकाचे नाव आहे.
घटनास्थळावरून मिळालेली माहिती अशी, रविवारी रात्री ढेबेवाडी पोलीस ठाण्याची खाडी कराड-ढेबेवाडी मार्गाने कराड कडून ढेबेवाडीकडे निघाली होती. वाटेत कुसूर येथे ढेबेवाडी पोलीस ठाण्याच्या या गाडीची चौघांना धडक बसली. ही गाडी चालक शंकर खेतमर चालवत होते. अपघातात एका दुचाकीचे आणि पोलीस गाडीचेही मोठे नुकसान झाले. कोळेवाडीचा सुजल उत्तम कांबळे हा युवक जागीच ठार झाला. तर अन्य तिघेजण जखमी झाले.
हा अपघात कराड ग्रामीण पोलिसांच्या हद्दीत घडल्याने कराड ग्रामीण पोलिसांनी घटनास्थळी धाव घेतली. जखमींना कराडच्या कृष्णा रूग्णालयात आणण्यात आले असून तेथे त्यांच्यावर उपचार सुरू आहेत. या अपघाताची नोंद कराड ग्रामीण पोलीस ठाण्यात करण्याची प्रक्रिया सुरू होती. अपघाताचा अन्य तपशील चौकशीनंतर समोर येईल, असे पोलिसांकडून सांगण्यात आले.
