चांगभलं ऑनलाइन | मुंबई प्रतिनिधी
राज्यतील शेतकऱ्यांसाठी नमो शेतकरी महासन्मान निधी योजनेच्या पहिल्या हप्त्याला राज्य सरकारने मंत्रिमंडळ बैठकीत मंजुरी दिली आहे. त्यामुळे राज्याचा दोन हजारांचा पहिला हप्ता लवकरच शेतकऱ्यांच्या खात्यात जमा होणार आहे. या योजनेसाठी 1 हजार 720 कोटी रुपयांच्या निधीस मान्यता मिळाली आहे. त्यामुळे शेतकऱ्यांना नमो सन्मान योजनेचे 6 हजार रुपये एकत्रित मिळतील.
राज्य सरकारच्या या निर्णयामुळे प्रत्येक पात्र शेतकऱ्याला राज्य सरकारकडून वर्षाकाठी 6 हजार रुपये मिळतील. एप्रिल ते जुलै 2023 कालावधीसाठीचा पहिला हफ्ता शेतकऱ्यांच्या खात्यात जमा होणार आहे. केंद्र आणि राज्य सरकारचे मिळून वर्षाला एकूण 12 हजार रुपये राज्यातील शेतकऱ्यांना मिळणार आहेत. उपमुख्यमंत्री देवेंद्र फडणवीस यांनी अर्थ संकल्प मांडताना याची घोषणा केली होती. या निधीला काल झालेल्या मंत्रिमंडळाच्या बैठकीत मंजुरी देण्यात आली आहे.
मंत्रिमंडळाच्या बैठकीत झालेले निर्णय
मंत्रिमंडळाच्या बैठकीत एप्रिल 2023 ते जून 2023 या कालावधीच्या पहिल्या हप्त्याला मंजुरी दिली गेली आहे. त्यामुळे आता शेतकऱ्यांच्या खात्यात लवकरच हा पहिला हप्ता जमा होणार आहे. यासाठी 1, 720 कोटी रुपयांच्या निधीला शासनाने मान्यता दिली आहे.
उपमुख्यमंत्री आणि राज्याचे अर्थमंत्री देवेंद्र फडणवीस यांनी यंदाच्या बजेटमध्ये केंद्र सरकारच्या पंतप्रधान शेतकरी सन्मान योजनेच्या धर्तीवर ही नमो शेतकरी सन्मान योजना लागू करण्याचे जाहीर केले होते.
नमो महासन्मान योजना आहे अशी
नमो शेतकरी महासन्मान निधी योजना ही केंद्राच्या पंतप्रधान शेतकरी सन्मान योजनेसारखीच आहे. या योजनेनुसार पात्र शेतकऱ्यांच्या खात्यावर राज्य सरकार वर्षाला सहा हजार रुपये जमा करणार आहे. केंद्र सरकारकडून दर तीन महिन्याला दोन हजार रुपये शेतकऱ्यांच्या खात्यावर जमा होत असतात. अगदी तसेच आणखी दोन हजार रुपये आता राज्य सरकारही दर तीन महिन्याला शेतकऱ्यांच्या खात्यावर जमा करणार आहे. शेतकऱ्यांच्या खात्यावर वर्षाला केंद्राचे 6 हजार आणि महाराष्ट्र सरकारचे 6 हजार रुपये असे एकूण 12 हजार रुपये यापुढे जमा होत राहतील.
