चांगभलं ऑनलाइन | कराड प्रतिनिधी
येथील जनकल्याण प्रतिष्ठान संचलित सरस्वती विद्यामंदिर व विद्यालयातील विद्यार्थिनी अदिती मधुकर जाधव या इयत्ता ७ वी मधील विद्यार्थिनीने कोल्हापूर येथे झालेल्या राज्यस्तरीय शालेय रायफल शूटिंग स्पर्धेत ( १० मीटर एअर पिस्टल ) १४ वर्ष वयोगटामध्ये प्रथम क्रमांक प्राप्त करून गोल्ड मेडल मिळवले आहे. तिच्या यशाने राज्यस्तरावर सरस्वती विद्यामंदिर व विद्यालयाने ठसा उमटवला आहे.
अदितीचे या यशाबद्दल शाळेच्यावतीने शाळेत झांज पथकाचे वादन व सर्व शिक्षकांनी फुलांची उधळण करून, विद्यार्थांनी टाळ्यांच्या गजरात जल्लोषात स्वागत केले.
सरस्वती शैक्षणिक संकुलाच्यावतीने अदिती, तिचे पालक मधुकर जाधव व गौरी जाधव यांचे औक्षण करण्यात आले. शाळेच्यावतीने जनकल्याण प्रतिष्ठानचे सचिव अनिल कुलकर्णी यांच्या हस्ते सत्कार करण्यात आला.
प्रशिक्षक सारंग थोरात यांनी मार्गदर्शन केले. या यशाबद्दल जनकल्याण प्रतिष्ठानचे अध्यक्ष शिरीष गोडबोले, उपाध्यक्ष तुकाराम चव्हाण, सचिव अनिल कुलकर्णी, विद्यालयाच्या मुख्याध्यापिका सोनाली जोशी, रूपाली तोडकर, शरयू माटे, सरस्वती शैक्षणिक संकुलाचे समन्वयक विजय कुलकर्णी, क्रीडा शिक्षक दीपक पाटील, सर्व विद्यार्थी व पालक आदींनी तिचे अभिनंदन केले.
