🏆 पद्मभूषण उद्योगपती बाबा कल्याणी यांना ‘आदरणीय पी. डी. पाटील महाराष्ट्र भूषण पुरस्कार-2025’ जाहीर

कराड प्रतिनिधी, दि. 1 जुलै | चांगभलं वृत्तसेवा

कराड येथील आदरणीय पी. डी. पाटील गौरव प्रतिष्ठानतर्फे दिला जाणारा ‘आदरणीय पी. डी. पाटील महाराष्ट्र भूषण पुरस्कार-2025’ यंदा नामवंत उद्योगपती आणि पद्मभूषण पुरस्कारप्राप्त श्री. बाबा एन. कल्याणी यांना जाहीर करण्यात आला आहे.
या पुरस्काराची घोषणा प्रतिष्ठानचे उपाध्यक्ष डॉ. अशोकराव गुजर यांनी आयोजित पत्रकार परिषदेत केली. या वेळी प्रतिष्ठानचे सदस्य श्री. मानसिंगराव पाटील, श्री. दिलीपभाऊ चव्हाण, श्री. राजेंद्र माने, श्री. विजय साळुंखे, सौ. रेश्मा कोरे, संयोजक समिती सदस्य अल्ताफहुसेन मुल्ला, सौ. शोभाताई पाटील आदी उपस्थित होते.

🌟 पुरस्काराचे स्वरूप आणि पार्श्वभूमी…

कराडचे सुपुत्र स्व. पांडुरंग दादासाहेब पाटील (पी. डी. पाटील) यांच्या कार्याचा गौरव करण्याच्या उद्देशाने, प्रतिष्ठान गेल्या तीन दशकांपासून सामाजिक व सांस्कृतिक क्षेत्रात कार्यरत आहे. सन 2011 पासून सुरु झालेल्या या पुरस्काराने महाराष्ट्राची कीर्ती वाढवणाऱ्या अनेक दिग्गजांना गौरवण्यात आले आहे.
पहिला पुरस्कार शास्त्रज्ञ डॉ. रघुनाथ माशेलकर यांना प्रदान करण्यात आला होता. त्यानंतर डॉ. जयंत नारळीकर, डॉ. प्रकाश आमटे, डॉ. अभय बंग, डॉ. जब्बार पटेल, कु. नसिमा हुरजूक , डॉ. ज्येष्ठराज जोशी , डॉ. शां. बं. मुजुमदार, डॉ. रणजित जगताप, डॉ. शिवाजीराव कदम , डॉ. चंद्रकांत लोखंडे, श्री. अरुण जोशी हे दिग्गज या पुरस्काराचे मानकरी ठरले आहेत.

👏 बाबा कल्याणी यांचे कार्य…

भारत फोर्ज लिमिटेडचे अध्यक्ष , Kalyani Group चे व्यवस्थापकीय संचालक आणि Society of Indian Defence Manufacturers (SIDM), नवी दिल्ली चे संस्थापक अध्यक्ष असलेल्या बाबा कल्याणी यांनी देशाच्या संरक्षण उत्पादन क्षेत्रात मोठे योगदान दिले आहे. त्यांना भारत सरकारचा ‘पद्मभूषण’ सन्मान प्राप्त झाला आहे. राष्ट्रीय आणि आंतरराष्ट्रीय पातळीवरील समित्यांमध्ये ते सक्रिय असून, त्यांच्या कार्याची दखल घेत प्रतिष्ठानने 2025 चा पुरस्कार त्यांना देण्याचा निर्णय घेतला आहे.

🎖 पुरस्कार वितरण सोहळा…

हा पुरस्कार दिनांक 17 सप्टेंबर 2025 रोजी, स्व. पी. डी. पाटील यांच्या पुण्यतिथीनिमित्त, कराड येथे मान्यवरांच्या उपस्थितीत सन्मानपूर्वक प्रदान करण्यात येणार आहे.
हा निर्णय प्रतिष्ठानचे कार्याध्यक्ष राज्याचे माजी मंत्री बाळासाहेब पाटील यांच्या अध्यक्षतेखाली नुकत्याच पार पडलेल्या विश्वस्त मंडळाच्या बैठकीत घेण्यात आला.