चांगभलं ऑनलाइन | कराड प्रतिनिधी
सैदापूर, विद्यानगर येथील समाजभूषण बाबुराव गोखले ग्रंथालयास ग्रामीण ‘ब’ वर्गातील सातारा जिल्हा ग्रंथालय संघाचा उत्कृष्ट ग्रंथालय पुरस्कार जाहीर करण्यात आला. सातारा जिल्हा ग्रंथालय संघाचे अध्यक्ष ज्येष्ठ सामाजिक कार्यकर्ते संभाजीराव पाटणे यांनी या पुरस्काराची घोषणा केली. हा पुरस्कार जिल्हा ग्रंथालय संघाचे 50 वे वार्षिक अधिवेशन 28 जानेवारी 2024 रोजी आझाद कॉलेज ऑफ एज्युकेशन,सातारा येथे होत असून अनेक मान्यवरांच्या हस्ते हा पुरस्कार प्रदान करण्यात येणार आहे.
समाजभूषण बाबुराव गोखले ग्रंथालयास पंचवीस वर्षे पूर्ण होत आहेत. अनेकांनी केलेल्या आर्थिक व ग्रंथरुपी मदतीने हे ग्रंथालय हजारो ग्रंथ व तीन हजार पाचशे वाचक सभासदांच्या प्रेरणेने उभे आहे.हा उत्कृष्ट ग्रंथालय पुरस्कार जाहीर झाल्याबद्दल कराड दक्षिण काँग्रेस कमिटीचे उपाध्यक्ष नितीश जाधव (नाना) यांच्या हस्ते ग्रंथालयास ग्रंथ भेट देऊन अभिनंदन करण्यात आले.
यावेळी ग्रंथालयाच्या अध्यक्षा सौ.कांचन धर्मे,प्रा.दादाराम साळुंखे, प्रा.टी.एच. ऐवळे, प्रा.अलकेश ओहळ, त्याचबरोबर ग्रंथपाल रुक्साना नदाफ,सीमा कांबळे तसेच ज्येष्ठ नागरिक व वाचक,ग्रंथालय सभासद उपस्थित होते.
