वडील भंगार गोळा करायला लावतात, दारूसाठी पैसे देत नाहीत म्हणून मुलाकडून बापाचा खून

चांगभलं ऑनलाइन | पाटण
दारू पिण्यास पैसे देत नसल्याने व भंगार गोळा करण्यास सांगत असल्याने चिडून जावून मुलानेच भंगार गोळा करणाऱ्या बापाचा खून केल्याची माहिती पाटण पोलिसांनी या खूनप्रकरणी ताब्यात घेतलेल्या मुलाकडून पोलिसांना मिळाली आहे.

याबाबत पाटण पोलिसांकडून मिळालेली माहिती अशी,
दि. ०२ डिसेंबर २०२३ रोजी पावणे दहाच्या सुमारास पाटण येथे पाटण ते चाफोली जाणारे रोडलगत बी.एस.एन.एल. ऑफिसचे समोर स्मशानभुमीत एक इसम पडला असून त्याचे डोक्यातून रक्त आले आहे, असा डायल ११२ वरून पाटण पोलिसांना कॉल आला‌. सदर बातमीची खात्री करण्याकरीता हवालदार मोरे यांनी घटनास्थळी जावून केली. त्यानंतर सहा. पोलीस फौजदार भरते, हवालदार पुजारी , माने, चालक गुरव असे शासकीय जीपने रवाना होवून घटनास्थळी पोहोचले. सदर ठिकाणी अंदाजे ४० वर्षे वयाचा पुरूष त्याच्या डोक्यात मारहान होवून रक्त येवून तो जागीच मयत झालेला होता. सदर इसमास कोणीतरी अज्ञात इसमाने अज्ञात कारणावरून डोक्यात व कानावर कोणत्यातरी हत्याराने वार करून जिवे ठार मारल्याचे स्पष्ट झाले.

मयताची ओळख स्थानिक ग्रामस्थांचे मदतीने पटवित असताना सदरचा मयत इसम हा कातकरी समाजाचा असलेचे समजून आले. कातकरी समाजाचे पाटण नगरपंचायतीचे नगरसेवक संतोष पवार हे तेथे आलेनंतर त्यांनी त्यांचे कातकरी समाजाचा प्रकाश परशुराम पवार वय ४० वर्षे रा. मानेवाडी ता. जि. सातारा हल्ली रा. पाटण ता. पाटण हा असल्याचे सांगितले. मयताचे कोणीही नातेवाईक पाटण येथे नसल्याने त्याचे नातेवाईक यांची माहीती काढून वडील व दोन भाऊ यांना संपर्क करून त्यांना पोलिसांनी बोलावून घेतले. नातेवाईक वडील व दोन भाऊ यांनी मतयास ओळखून तो त्यांचा मुलगा व भाऊ असल्याचे सांगितले.

मयत प्रकाश पवार हा त्याचा अल्पवयीन मुलगा याचेसह पाटण येथे राहणेस होता. दोघेजन पाटण व आजूबाजूचे परीसरामध्ये फिरून भंगार गोळा करुन व तो विकून त्यांचा उदरनिर्वाह करीत होते. सदर इसमाचा खून झालेपासून त्याचा मुलगा हा कोठेतरी निघून गेला होता.

त्याच्यावर पोलिसांचा संशय बळावल्याने गुन्ह्याचे तपासकामी पथके तयार करून पोलीस निरीक्षक विकास पाडळे, सहा. पोलीस निरीक्षक. कामत यांचे वेगवेगळ्या पथकांनी अज्ञात आरोपीचा व मयताचे मुलाचा शोध घेतला असता दि.०७ डिसेंबर २०२३ रोजी मयताचा अल्पवयीन मुलगा मिळून आला. त्याच्याकडे चौकशी केली असता वडील हे जबरदस्तीने भंगार गोळा करण्यास सांगतात व दारु पिण्यास देत नाहीत, या कारणावरून त्यांचे डोक्यात दगड घालून मारल्याचे त्याने पोलिसांना सांगितले. त्यामुळे पाटण पोलिसांना गुन्ह्याची उकल करण्यास यश आले.

पोलीस अधीक्षक समीर शेख व अप्पर पोलीस अधीक्षक आंचल दलाल, उपविभागीय पोलीस अधिकारी विवेक लावंड यांचे मार्गदर्शनाखाली पोलीस निरीक्षक विकास पाडळे, सहा. पोलीस निरीक्षक संदीप कामत, सहा. पोलीस फौजदार भरते, हवालदार पुजारी, माने, चालक गुरव यांनी ७२ तासामध्ये सदर गुन्ह्याची उकल केली असून गुन्ह्यात खून करणारा अल्पवयीन मुलगा ताब्यात घेतला आहे.

या गुन्ह्याचे तपासामध्ये सहभागी असलेल्या पोलीस अधिकारी व पोलीस अंमलदार यांचे पोलीस अधीक्षक समीर शेख व अप्पर पोलीस अधीक्षक आंचल दलाल, उपविभागीय पोलीस अधिकारी विवेक लावंड यांनी अभिनंदन केले आहे.