नागपूर | चांगभलं वृत्तसेवा
अंडरवर्ल्ड डॉन म्हणून ओळखला जाणारा अरुण ‘डॅडी’ गवळी तब्बल १८ वर्षांनंतर नागपूर मध्यवर्ती कारागृहातून बाहेर आला आहे. सर्वोच्च न्यायालयाने मंजूर केलेल्या जामिनानंतर शुक्रवारी दुपारी गवळीची सुटका करण्यात आली.
नागपूर कारागृह प्रशासनाने पोलिस बंदोबस्तात मागील गेटने त्याला बाहेर काढले. त्यानंतर नागपूर पोलिसांनी त्याला कडेकोट सुरक्षा व्यवस्थेत डॉ. बाबासाहेब आंबेडकर आंतरराष्ट्रीय विमानतळावर आणले. तेथून गवळी विमानाने मुंबईकडे रवाना झाला.
गवळीला २००७ मध्ये घाटकोपर येथील शिवसेना नगरसेवक कमलाकर जामसांडेकर यांच्या हत्येप्रकरणी जन्मठेपेची शिक्षा ठोठावण्यात आली होती. त्यानंतर तो नागपूर मध्यवर्ती कारागृहात शिक्षा भोगत होता. गेल्या अनेक वर्षांपासून जामिनासाठी प्रयत्न सुरू होते, मात्र अखेर सर्वोच्च न्यायालयाने गुरुवारी त्याला जामीन मंजूर केला.
सर्वोच्च न्यायालयाने जामीन मंजूर करताना काही अटी-शर्ती लागू करण्याचे निर्देश दिले होते. त्यानुसार मुंबई सत्र न्यायालयाने त्या अटी निश्चित केल्या. त्यानंतर नागपूर कारागृह प्रशासनाला आदेश मिळताच गवळीची सुटका करण्यात आली.
गावगाड्यातून ‘डॅडी’ म्हणून ओळखल्या जाणाऱ्या अरुण गवळीच्या सुटकेने पुन्हा एकदा राजकीय आणि गुन्हेगारी वर्तुळात चर्चेला उधाण आले आहे.
